Кога и како да почнете со храна кај вашето доенче?

Во првите месеци од животот најдобрата и единствена храна за новороденчето е мајчиното млеко. Тоа ги содржи сите хранливи материи што му се потребни за раст и развој. Исто така, му обезбедува заштита од инфекции, ја зајакнува врската со мајката и го поддржува имунитетот. За исхраната кај доенчињата во подоцнежниот период и на која возраст треба да почнат да се воведуваат други намирници „Мама не си сама“ побара одговори од педијатарот д-р Андријана Ставревска.

Доењето не претставува само храна за бебето, туку и чувство на заштитеност, грижа, љубов и континуирана социјална стимулација. Првите 4 месеци бебињата се само на доење или на млечни формули, кои се даваат во одреден временски интервали од 2,5 до 3 часа. За млечните формули многу е важно да се раствораат правилно: во 30 ml се става 1 дозерка од млекото. Кога доенчето ќе наврши 4 месеци, може да се започне со воведување еден оброк наместо еден подој или млечен оброк, вели д-р Ставревска, специјалист по педијатрија.

Кога да започнете со воведувањето храна?

Се започнува со зеленчук или со овошје, советува педијатарот, и споделува шема за исхрана кај доенчињата според навршените месеци:

• 4. МЕСЕЦ – МОРКОВ, ЈАБОЛКО, БАНАНА, СПАНАЌ, БЛИТВА, ТИКВИЧКА, ОРИЗОВИ И ПЧЕНКАРНИ СНЕГУЛКИ, МАСЛИНОВО МАСЛО НЕКОЛКУ КАПКИ
• 5. МЕСЕЦ – ПРАСКА, КАЈСИЈА, СЛИВИ, ЦРЕШИ, ДИЊА, ДУЊА, КОМПИР, БРОКУЛА, МЛАДА БОРАНИЈА, КАРФИОЛ, МИСИРКИНО ИЛИ ПИЛЕШКО БЕЛО МЕСО
• 6. МЕСЕЦ – ЦВЕКЛО, ТИКВА, МЛАДО КРАВЈО СИРЕЊЕ, УРДА, ПУТЕР, ПЧЕНИЧНИ, ЈАЧМЕНОВИ И ’РЖАНИ СНЕГУЛКИ, ГРИЗ, МЛЕЧНА КАША СО БИСКВИТИ, ЛЕБ (ИНТЕГРАЛЕН) И ДВОПЕК, ТЕЛЕШКО МЕСО (ВО 6. МЕСЕЦ СЕ ВКЛУЧУВААТ ДВА ОБРОКА)
• 7. МЕСЕЦ – ЈОГУРТ, КИСЕЛО МЛЕКО, МЛАД ГРАШОК, РЕПКА, ДОМАТИ, ТЕСТЕНИНИ (МАКАРОНИ, ШПАГЕТИ, ЈУФКИ, ТАРАНА), ЖОЛЧКА ОД ТВРДО ВАРЕНО ЈАЈЦЕ ¼, БИСКВИТИ ЗА ГРИЦКАЊЕ
• 8. МЕСЕЦ – ПАВЛАКА, ЗЕЛКА, КЕЉ, ПРАЗ, ЈУНЕШКО И ТЕЛЕШКО МЕСО
• СО 9, 10, 11 НАВРШЕНИ МЕСЕЦИ – КОРНФЛЕКС, МАГДОНОС, ЛУКЧЕ, ЧОКОЛАДА ВО ПРАВ
• СО НАВРШЕНИ 12 МЕСЕЦИ СЕ ВОВЕДУВААТ ЛЕЌА, ГРАВ, СИНА РИБА, ЦИТРУСНО ОВОШЈЕ, ЈАГОДИ, РИБИЗЛИ, КАПИНИ, МАЛИНИ, БОРОВИНКИ, ТВРДО ВАРЕНА БЕЛКА
• СО 13 МЕСЕЦИ И НАТАМУ – ТВРДИ И ТОПЕНИ СИРЕЊА, МУСЛИ СО МЕШАНО ОВОШЈЕ, САРДИНА, СВИНСКО МЕСО ВО МАЛИ КОЛИЧИНИ, СУВОМЕСНИ ПРОИЗВОДИ, ВНАТРЕШНИ ОРГАНИ, СОЛ И ЗАЧИНИ ВО СОСЕМА МАЛИ КОЛИЧИНИ

Доктор Ставревска потенцира дека ако мајката дои, треба да продолжи со доењето. Дохраната не треба да се воведува пред навршувањето на 4. месец на доенчето, а најдоцна до 6. месец, бидејќи млекото, без разлика дали е мајчино или млечна формула, не може да ги задоволи прехранбените потреби на детето кое е во раст и развој.

Зошто е важна правилната и здрава исхрана кај доенчето?

Правилната исхрана во првата година е темел за здравјето на детето во иднина, вели педијатарот и посочува дека таа влијае врз:

• растот и развојот на телото;
• мозочната функција;
• формирањето на имунолошкиот систем;
• навиките кои остануваат и во подоцнежната возраст.

Нездравата или лошо планираната исхрана може да доведат до проблеми со варењето, недостиг на витамини и минерали, прекумерна тежина или до слаба отпорност на инфекции, предупредува д-р Ставревска и додава дека со љубов, внимание и постепеност воведувањето на храната може да биде прекрасен процес и за детето и за родителите. Тоа е првиот чекор кон самостојност, здрави навики и силен организам!