Како да превенирате уринарна инфекција кај детето?

Уринарните инфекции се најчестото заболување на уринарниот тракт, а истовремено и една од најчестите инфекции кај децата, посочува за „Мама не си сама“ детскиот нефролог доц. д-р Надица Ристоска-Бојковска од клиничката болница „Аџибадем систина“.

• Уринарната инфекција се дефинира како инвазија на микроорганизми во ткивото на уринарниот тракт (или, лабораториски, присуство на значителен број бактерии во урината, односно позитивна уринокултура), објаснува докторката и набројува дел од причините за уринарни инфекции кај децата:

- нецелосно празнење на мочниот меур, што овозможува бактериите да се задржат и да се размножат;

- вродени аномалии на бубрезите или на уринарниот тракт, кои се чести кај доенчињата и кај малите деца;

- опстипација (запек) и слабо внесување течности, што може да го зголеми ризикот од инфекција;

- нарушување на хигиенските мерки, како што е неправилното бришење по дефекација;

- настинка и стрес, кои можат да ја намалат имунолошката одбрана.

Симптоми на уринарните инфекции

Според детскиот нефролог, симптомите варираат во зависност од возраста на детето и од јачината на инфекцијата.

• Кај новороденчињата и доенчињата се јавуваат неспецифични симптоми, како на пример вознемиреност, плачливост, повраќање, течна столица и покачена температура.
• Кај поголемите деца може да се јават висока температура, болки во слабинскиот дел, често и болно мокрење, печење при мокрење и крв во урината, вели д-р Ристоска-Бојковска.

Како се поделени уринарните инфекции?

Доктор Надица Ристоска-Бојковска за „Мама не си сама“ објаснува дека уринарните инфекции се делат според:

• клиничките симптоми: симптоматска и асимптоматска уринарна инфекција;
• начинот на настанување: примарна некомплицирана (во нормален уринарен тракт);
• локализацијата: инфекција на горниот уринарен тракт (бубрези) и инфекција на долниот уринарен тракт (мочен меур);
• возраста: кај новородени, инфекција кај дете до 2 години, инфекција кај дете на предучилишна возраст или инфекција кај дете на училишна возраст;
• клиничките аспекти важни за лекувањето: прва инфекција, повторувачки инфекции или неискоренета бактерија во текот на лекувањето.

Зачестеноста зависи од возраста и од полот на детето, потенцира д-р Ристоска-Бојковска.

• Ризикот за заболување од симптоматска уринарна инфекција изнесува 3 -5 % кај девојчињата и 1- 2% кај момчињата. Кај девојчињата застапеноста е 10 : 1 во однос на застапеноста кај машките деца. Единствено исклучок се новородените кај кои превладуваат машките деца во однос 2 : 8 : 1 до 5 : 1. Причина за тоа се поголемата склоност на машките деца кон сепса и поголемата застапеност на конгенитални аномалии на уринарниот тракт кај овие новороденчиња.

Уроинфекциите се најчесто асцендентни (бактериите се качуваат од мочниот меур кон бубрезите). Бактериите од цревната флора вршат колонизација (ги препокриваат) надворешните делови од гениталниот и од уринарниот тракт (уретрално устие), по што следува нивно проширување во уретрата, мочниот меур, мочоводните канали и во бубрезите, објаснува детскиот нефролог.

Која е најдобрата заштита од уринарни инфекции?

Најважна заштита од уринарни инфекции е нормалната уродинамика (нормално поминување на урината низ уринарниот тракт), потенцира д-р Ристоска-Бојковска.

• Нарушувањето на уродинамиката води кон застој на урината, при што доаѓа до размножување на бактериите и до опасност од уринарна инфекција. Опстипацијата (запек или тврда столица) е, исто така, причина за појава на уроинфекција. Често во такви ситуации е намалена дневната фреквенција (честотата) на мокрење, што е причина за размножување на бактериите, потенцира детскиот нефролог и препорачува соодветно внесување течности, навремено и целосно празнење на мочниот меур, правилни хигиенски практики, особено кај девојчињата, како и редовни прегледи за рано откривање вродени аномалии. Во спротивно, доколку не се третираат навремено, уринарните инфекции може да доведат до сериозни компликации, вклучувајќи оштетување на бубрезите и сепса. Затоа е важно родителите да бидат свесни за симптомите и да побараат лекарска помош при секое сомневање, советува докторката.