Зошто кај бебињата се јавува воспаление на кожата покриена со пелени?

Воспаление на кожата со црвенило во пределот покриен со пелени се јавува речиси кај секое бебе, дури и при најдобра хигиена и нега. Дали пеленскиот дерматитис може да му наштети на новороденчето, како да се смири иритацијата и кога да се побара лекарска помош од педијатар и од дерматолог, за Мама не си сама објаснува проф. д-р Катерина Дамевска од Универзитетска клиника за дерматологија – Скопје.

Пеленскиот дерматитис е најчестата дерматолошка состојба кај доенчињата. Може да се јави кај секое доенче, дури и при најдобра нега и грижа. Станува збор за воспаление на кожата (дерматит) во зоната покриена со пелена. Најчесто се работи за лесна иритација, која поминува со едноставни постапки, но некогаш е силно изразена за што е неопходна консултација со лекар, вели професорката по дерматологија.

Причини за појава на воспалението

Според дерматологот д-р Дамевска, оваа регија е постојано влажна и изложена на урина и на фецес. Пелената создава специфични микроуслови (влажна и топла комора), што ја олеснува иритацијата. Најчести причини се реткото менување на пелените, малите пелени кои предизвикуваат триење, како и зачестениот пролив. Најчесто се јавува на возраст од 4 до 12 месеци, особено во периодот на внесување цврста и разновидна храна. 

Како се манифестира пеленскиот дерматит?

Професорката по дерматологија д-р Катерина Дамевска посочува дека воспалението започнува како црвени полиња, најпрвин на проминентните делови (со поштеденост на дното на наборите на кожата), со можност да се прошири на целата зона покриена со пелената.

• Кај благите форми зафатена е помала површина, при што кожата е само црвена и чувствителна.
• Кај потешките форми кожата е црвена, топла на допир и чувствителна.
• Кај многу тешките форми се јавуваат ранички (ерозии или улцерации). Кога промените се дискретни, детето не чувствува нелагодност. При тешки форми детето е вознемирено и плачливо, особено при менување пелени, посочува таа.

Како се лекува пеленскиот дерматитис?

Дерматологот Дамевска советува дека најчесто се доволни следните едноставни мерки со кои кожата може да заздрави за 2-3 дена:

• честа промена на пелените, со што ќе се овозможи регијата да е сува;
• миење на регијата со благи купки и со сапуни кои треба добро да се исплакнат;
• бришењето треба да е нежно, со впивање на водата со мека крпа, без грубо триење;
• да не се користат влажни марамчиња дури не се добие целосно заздравување;
• аерација на регијата: во текот на денот, во неколку наврати, детето да се остави без пелена, на воздух (тоа особено се препорачува по миење и сушење);
• нанесување заштитен препарат кој ќе направи бариера и кој нема да дозволи директен контакт на кожата со урината и со фецесот (најдобро е да се користат бариерни кремови кои содржат цинк оксид).

Кога да се побара лекарска помош?

Според професорката по дерматологија, родителите треба да се консултираат со дерматолог или со педијатар во следните ситуации:

• нема подобрување по 2-3 дена со примена на наведените постапки;
• промените се шират во околината на пеленската регија;
• промени се јавуваат во нови регии (во наборите на вратот и под мишките);
• детето има придружна температура;
• се појават подлабоки ранички;
• промените се влажат, крвават или се покриени со гноен секрет;
• детето има болка (плаче при движење или мокрење);
• кога детето е поголемо, одбива да мокри поради болка.

Други причини за црвенило и за ранички во пеленската регија

Втора причина за црвенило во пеленската регија е инфекцијата со кандида, која често се надоврзува на обичниот пеленски дерматит.

Поретки причини се контактниот алергиски дерматит, недостигот од цинк, стрептококната перијанална инфекција, стафилококната инфекција (импетиго), имунодефициенциите и малнутрициите, вели дерматологот.

Чести заблуди и грешки

Професорката по дерматологија Катерина Дамевска од Клиниката за кожни болести ги споделува следните корисни медицински информации за пеленскиот дерматит (воспаление со осип на кожата кај бебињата во пределот покриен со пелени):

• Пеленскиот дерматит не е инфекција, па затоа нема потреба да се нанесуваат антибиотски или антимикотични средства.
• Пеленскиот дерматит не е алергија и нема потреба од алерголошки тестирања.
• Дијагнозата се поставува со преглед и, вообичаено, нема потреба од додатни дијагностички процедури.
• Не нанесувајте кортикостероидни кремови и масти без консултација со лекар поради можноста за развој на несакани ефекти.