Совети од педијатар како да му помогнете на бебето додека му никнуваат заби

Никнувањето на првите заби кај бебињата и кај доенчињата е индивидуален процес, кој кај различни бебиња може да се јави во различни периоди. Иако е ретка појава, некои бебиња се раѓаат со првите заби, кај други забите може да почнат да никнуваат пред да наполнат 4 месеци, а кај некои бебиња првите заби може да се појават и по 12 месеци, објаснува за „Мама не си сама“ педијатарот Елeна Манолева - Николовска.

• Кај најголем број бебиња првите запчиња почнуваат да никнуваат на возраст од околу 6-7 месеци. На возраст од три месеци бебињата почнуваат да го истражуваат светот со устата и тоа е период кога бебињата почнуваат да ги ставаат рацете во устата, поради што има зголемено лачење на плунка. Тоа е најчестата причина зошто многу родители се прашуваат дали можеби тоа се првите знаци на никнување запче кај нивното бебе. Но не се секогаш ставањето на рацете во устата и лигавењето знак дека кај детето ќе никнат заби во тој период, вели м-р д-р Елена Манолева-Николовска, специјалист педијатар.

Како реагираат бебињата додека им никнуваат заби?

Вообичаено, бебињата немаат голем проблем при никнувањето на забите. Но, исто како и периодот на никнување на првите заби, кој е индивидуален за секое дете, така и самиот процес на никнување заби може да биде со различна манифестација кај бебињата.

• - Индивидуално, кај некои деца во тој период може да се јават поголема раздразливост, плачливост и немирен сон, кои најчесто се резултат на непријатноста на местото каде што никнуваат забите. Поради присуство на црвенило, оток и на болка на непцата околу забот кој никнува, бебето може да се лигави многу повеќе од вообичаено и да одбива кисела храна или течности. Ретко се случува бебето да има и лесно покачена телесна температура од 37,2 до 37,3 степени. Но, секоја температура над 37,5 или над 38 степени не е поврзана со никнување заби и може да претставува симптом и знак на болест или на инфекција, поради што родителите треба да се консултираат со педијатарот на бебето, советува д-р Елена Манолева - Николовска

Како да му помогнете на вашето бебе додека му никнуваат запчиња? 

За „Мама не си сама“ педијатарот Елена Манолева - Николовска советува како родителите можат да му помогнат на своете бебе или дете во ублажувањето на болката при никнувањето заби.

• Тоа може да се направи со локално масирање на болните непца со чисти прсти и со специјално направени гелови за непца приспособени за возраста на бебињата и на децата. Исто така, од помош може да бидат полумеки играчки кои се наменети за периодот на никнување на забите, како и чиста замрзната или влажна крпа за перење, која краткотрајно, како студена облога, може да се стави на местото каде што никнува запчето. Во случаи и во периоди кога детето е многу вознемирено и плачливо и кога има неправилен и немирен сон, еднократно и краткотрајно може да му се помогне со давање сируп Парацетамол или Ибупрофен за да се смири болката и за да се овозможи мирен сон, објаснува д-р Манолева - Николовска.